Ministri i Bujqësisë, Edmond Panariti, gjatë një prononcimi për mediat në Korçë, pasi vizitoi nje kompani e cila ka përfituar fonde nga skemat e financimit të Ministrisë se Bujqesisë, iu përgjigj akuzave, edhe atyre personale të kreut të opozitës, Lulzim Basha, të bëra sot nga Dibra.
“E dëgjova sot zëdhënësin e Rilindjes, teksa fliste për bujqësinë dhe më akuzonte mua si ministër bujqësie për çështje fondesh, për mungesë subvensionesh etj. Por, ai nuk e di se si e gjetëm bujqësinë kur e morëm pushtetin në 2013-ën, me një mbështetje qesharake, si asistencë sociale. E gjetëm në raportet e import-eksporteve 1 me 7, e gjetëm në një gjendje mjerane. Ndërkohë që shumëfishuam sipërfaqet e serave, trefishuam prodhimin e brendshem, shtuam subvensionet e grandet e sot bujqësia është rritur ndjeshëm.Po ashtu, 3-fishuam eksportet e produkteve bujqësore etj”, theksoi Panariti.
Më tej, lidhur me mungesën e fondeve në bujqësi, ministri Panariti ripërseriti shqetësimin e tij:
“Ne kemi kërkuar rritje fondesh, kemi kërkuar shtim të tyre por nuk na është dhënë. Por, kur ne të marrim pushtetin, do të 5-fishojme fondet për bujqësinë dhe do ta lehtësojmë atë nga taksat, duke ia bërë zero. Kjo është edhe një nga pikat e forta te programit të LSI.”
Ndërkohë iu përgjigj edhe një tjetër akuze personale të bërë nga Basha, nga Dibra. “E dëgjova teksa përgojonte sot emrin tim. Por, në këtë rast, Basha nuk e ka me mua, por me panaritasit, banorët e një treve me histori të shquar në historinë e Shqipërisë, një zone me tradita dhe patriotike. Jam i sigurt se panaritasit do t’ia kthejnë këtë dhe do të dinë si të përgjigjen në 25 qershor.”, u shpreh ai.
(XH.A/SHUPLAKA)
