Pandeli Majko një mesazh për Metën: Nuk i takon më pjesës, por të tërës. Paralajmërimet destabilizuese habisin të huajt

Deklaratat e presidentit të ardhshëm Ilir Meta, se nuk do ta dekretojë qeverinë nëse do cënohet vota e lirë, apo që do armatosë populin nëse policia nuk bën asgjë për të ndëshkuar dhunuesit e qytetarëve, duket se nuk janë pritur mirë nga Pandeli Majko.

Deputeti shprehet se ndihet i shqetësuar për këto deklarata, ndërsa shton se habisin të huajt, fyejnë vendin dhe degradojnë marrëdhëniet politike.

Majko i bën thirrje Metës që të lërë pasionin për garën politike, pasi nuk i takon më pjesës port ë tërës. Megjithatë duhet të përmendim, se pavarësisht se Meta është zgjedhur presidenti, ai nuk e ka bërë betimin akoma, kështu që nuk mund ta pengojë asgjë të marrë pjesë në fushatën e LSI-së.

“SHENIM PER PRESIDENTIN…META

Thellësisht i shqetësuar për deklarimet dhe protagonizmin e njëanshëm të presidentit të zgjedhur, Ilir Meta. Akuzat dhe paralajmërimet destabilizuese që ai po hedh këto ditë nuk i shërbejnë Shqipërisë. Ato habisin të huajt, fyejnë vendin dhe degradojnë marrëdhëniet politike.

Si politikan i vjetër, ai duhet tja lërë pasionin e garës politike kolegëve që e zëvendësuan në Partinë e tij. Presidenti i zgjedhur, nuk i takon më pjesës por të tërës.

Akuzat apo paralajmërimet nga podiume partiake janë të papërshtashme në rastin më të mirë. Presidenti i zgjedhur duhet ti lërë mënjanë “bombat” për mosdekretim qeverish dhe armatosjen e popullit…

Si rregull, Presidenti shprehet për ato që ndodhin dhe jo për të kundërtën. Ai nuk është as gjykatës dhe as gjykatë. Qëndrimet e tij nuk janë gjykime emocionale por detyrime kushtetuese.

Kritikat e një presidenti të sapozgjedhur për kryeministrin e vendit të tij nuk lexohen së pari në mediat fqinje. Punët e shqiptarëve zgjidhen në shtëpinë e tyre ku Presidenti i Republikës është një figurë qëndrore. Ai përfaqëson unitetin kombëtar dhe jo marrëdhëniet me fqinjët.

Ajo që nisi si tur falenderimesh nga zoti Meta nuk ka pse kthehet në tur fyerjesh për ata që e zgjodhën. Presidenti i zgjedhur duhet të lërë LSI në fatin e vet politik dhe të përgatitet për “kujdestarinë” e Shqipërisë. 
 Uroj reflektimin të presidentit të zgjedhur. Gjakftohtësia është cilësi që nuk është e shkruajtur në Kushtetutë. Kjo nuk justifikon të kundërtën.”, reagon Majko. (D.D/Shuplaka)