Të pakta janë fjalimet që vlejnë të veçohen nga diskutimi i djeshëm maratonë sa i përket Projekt Buxhetit për vitin e ardhshëm.
Një prej tyre është ai i mbajtur nga ministri i diasporës Pandeli Majko. Duke iu referuar rritjes së pensioneve që reklamohet fort nga ana e qeverisë, Majko u shpreh se kjo rritje nuk përkëthehet as më shumë dhe as më pak sesa një kofshë pule.
“Duke përfituar dhe nga largimi i kolegut tim Ahmetaj, sepse i kam dhënë fjalën që nuk do të flas me rezerva për çështje të buxhetit, si kur rrisim pagat dhe pensionet. Ata të Ministrisë së Financave i kanë qejf, i rrisin me përqindje, thonë 10%. Tani 10% e pagës sonë i thonë një darkë, 10% e pagës së një pensionisti i thonë një kofshë pule, për të mos thënë nga ato këmbët e pulës përpara. Mbase është momenti që në këtë drejtim ne të shkëputemi pak nga teknika e përqindjeve, pasi te pensionistët kjo nuk është vetëm çështje përqindjesh”, deklaroi Majko.
Ministri për Diasporën theksoi se për pensionistët rritja që pretendon qeveria është minimaliste, ndaj edhe kërkoi që të shihen mundësitë për një tjetër rritje të pensioneve.
“10-ta duket e bukur për ata që kanë rroga të mëdha, por për pensionistët nuk është ndonjë zhvillim kushedi se çfarë. Është një moment, të cilin dëshiroja ta ngrija me dashamirësi, sidomos karshi përfaqësueseve të Ministrisë së Financave, me qëllim që çështja e përqindjeve, sidomos për sa i përket rritjes së pensioneve, të shikohet pak më ndryshe nga logjika dhe këndvështrimi i pensioneve”, tha Majko.
Sipas ministrit, buxheti i qeverisë nuk mund të zgjidhë të gjitha problemet e shqiptarëve, por ai është ndërtuar mbi dëshira të mira. Majko refuzoi të komentojë akuzat e opozitës, se buxheti i vitit 2018 është buxhet që do të pastrojë paratë e përfituara nga biznesi i drogës, madje kërkoi nga opozita të marrë përgjegjësitë që i takojnë përpara shqiptarëve.
“Një buxhet nuk i zgjidh të gjitha problemet e Shqipërisë. Në një buxhet dallohen disa dëshira, të cilat unë i konsideroj si dëshira të mira. Refuzoj as t’i përgjigjem dhe as ta komentoj faktin që dikush ngrihet dhe e quan buxhet të pastrimit të parave. S’mund të ketë pastrim parash me paratë e një buxheti të një qeverie të majtë apo të djathtë. Për kolegët e opozitës kam një këshillë shumë miqësore. Merrni disa përgjegjësi që ju takojnë. Jo të na mbani krahun ne”, theksoi ministri për Diasporën.
(E.K/Faxweb)
Discussion about this post