Panuçi kërkon maksimumin nga lojtarët, stërvitja vetëm 15 minuta e hapur për mediat dhe tifozët

Të gjithë po presim me padurim të shtunën për të parë në fushë Kombëtaren Shqiptare të Futbollit, nën drejtimin dhe të trajnerit të ri, Panuccit.

Ndërkaq djemtë vijojnë me përgatitjet në  stadiumin “Selman Stërmasi”. Me grupin sot është bashkuar mesfushori shtatshkurtër, Jahmir Hyka, i cili është vënë menjëherë nën urdhrat e teknikut italian.

Koha e lejuar për mediat dhe për tifozët e interesuar për të ndjekur stërvitjen është vetëm 15 minuta, dhe trajneri tregohet i kujdesshëm për të mbajtur hermetike skemat që do të aplikojë, shkruan ‘’Panorama Sport”.

Italiani u mbajti lojtarëve një fjalim të shkurtër përpara nisjes së stërvitjes, ku iu tërhoqi vëmendjen për gabimet e bëra me klubet e tyre si dhe kërkoi përqëndrim maksimal në stërvitje. Nuk munguan as frazat motivuese për sfidën e datës 2 shtator ndaj Lihtenshtejnit.

“Dua që të shoh maksimumin në stërvitje”, tha trajneri i cili më pas rreshtoi para lojtarëve edhe disa gabime përqendrimi qe ata kishin bërë gjatë ndeshjeve me klubet e tyre.

“Të shtunën duhet t’ia bëjmë jetën sa më të vështirë kundërshtarit”, ishte një prej frazave motivuese që Panuçi iu citoi gjatë fjalimit.