Papa e krahason gjendjen e ukrainasve me shfarosjen naziste të hebrenjve në Luftën e Dytë Botërore

Papa Françesku e ka krahasuar luftën në Ukrainë me shfarosjen e rreth dy milionë njerëzve – kryesisht hebrenj – nga nazistët në vitet e para të Luftës së Dytë Botërore.

Duke folur me besimtarët polakë gjatë audiencës së tij të përgjithshme javore, Françesku vuri në dukje se Universiteti Katolik i Lublinit në Poloni shënoi së fundmi përvjetorin e “Operacionit Reinhardt “.

Ky ishte emri i koduar për një operacion sekret në një pjesë të Polonisë së pushtuar, të cilën gjermanët e quajtën zona e “Qeverisë së Përgjithshme” dhe që përfshinte territore që tani ndodhen në Ukrainë.

” Kujtimi i kësaj ngjarjeje të tmerrshme le të lindë qëllime dhe veprime paqësore në secilin prej nesh ,” tha Papa, duke iu referuar në mënyrë specifike operacionit dhe duke thënë se ishte një operacion “asgjësimi”.

Më pas ai foli jashtë tekstit për të shtuar: “Dhe historia përsëritet. Ne shohim sot se çfarë po ndodh në Ukrainë”.

Rusia e përshkruan pushtimin e saj në Ukrainë si një “operacion special ushtarak” për të “denazistizuar” vendin dhe për të zhvendosur nacionalistët që i konsideron të rrezikshëm.

Ukraina dhe aleatët e saj akuzojnë Moskën për një luftë të paprovokuar që synon rrëmbimin e territorit nga fqinji i saj properëndimor.

Që nga fillimi i pushtimit në shkurt, Françesku ka përshkallëzuar kritikat e tij ndaj veprimeve të Rusisë.
Muajin e kaluar ai tha se ukrainasit po vuanin një “vuajtje agresioni” dhe i krahasoi vuajtjet e ukrainasve që nga lufta me “gjenocidin e tmerrshëm” të viteve 1930, kur udhëheqësi sovjetik Joseph Stalin imponoi zinë e bukës në vend.

Françesku ka sugjeruar vazhdimisht ndërmjetësimin e Vatikanit për t’i dhënë fund luftës, por kritika e tij në rritje ndaj Rusisë e bën këtë shumë të pamundur.

Në një intervistë muajin e kaluar me revistën jezuite America, Françesku foli për atë që ai e quajti brutalitetin e forcave ruse në Ukrainë.

“Në përgjithësi, më të ashpërt janë ata të Rusisë, por jo të traditës ruse, si çeçenët, burjatët etj. Është e qartë se agresori është shteti rus. Kjo është e qartë ”, tha Françesku.

Ministri i Jashtëm rus Sergei Lavrov i quajti komentet e Papës “jo të krishtera” dhe të pakuptueshme.