Ditën e sotme kryeministri Rama bëri të ditur emrat e kabinetit të qëverisë së re.
Por duke iu referuar emrave të kabinetit të ri qeveritar dhe praktikës së vitit 2013 për papajtueshmëri midis mandatave ministra – deputetë, rezulton se do të duhet të kemi 12 deputetë të rinj.
Sipas tabelës së “Institutit të Studimeve Politike” do të ketë ndryshime, të cilat priten të ndodhin.
Në qarkun Berat mandati do ti kalonte emrit pasues, Arben Konomi. Në Gjirokastër, për shkak të detyrimit për kuotë gjinore, mandati do ti kalonte një femre kandidate, Artemis Dralo, e angazhuar në Universitetin e këtij qyteti. Në Lezhë mandati do ti kalonte zonjës Jaku, drejtuese lokale e PS, kurse në Shkodër do të duhej të kemi dy emra të rinj, përfshirë biznesmenin Paulin Luli, i cili rezultoi fitues në Pukë, por në vend jofitues në listën proporcionale.
Në Tiranë do të siguronin mandate juristi Spartak Braho, kreu i FRESH Hyska, ish ministrja Milena Harito, si dhe juristja Hobdari. Në Vlorë mandati i ministrit Gjiknuri do ti kalonte emrit të parë grua të listës së mbetur, konkretisht Eloma Hodaj (Kurti), shefe kabineti e kryetarit të bashkisë Vlorë. Pesë qarqet e tjera, Dibër, Durrës, Elbasan, Fier e Kukës nuk kanë ministër.
Ndërkohë që duhet thënë se deri tani ende nuk ka një vendim lidhur me këtë.
(S.SH/Shuplaka)
Discussion about this post