Ambasada Amerikane në vendin tonë ka reaguar në Facebook, pas vendimit të administratës së Shteteve të Bashkuara për dëbimin nga teritorri amerikan të oficerëve të inteligjencës ruse. Ambasada ka shpërndarë një pjesë të deklaratës së Washingtonit lidhur me përdorimin nga ana e Rusisë të armëve kimike të nivelit ushtarak, në territorin e Mbretërisë së Bashkuar.
“Shtetet e Bashkuara e kanë ndërmarrë këtë masë në bashkëpunim me aleatët tanë në NATO dhe partnerët tanë kudo në botë, në përgjigje ndaj përdorimit të armëve kimike të nivelit ushtarak nga Rusia në territorin e Mbretërisë së Bashkuar, veprimi më i fundit në vazhdën e veprimeve të saj destabilizuese në mbarë botën.” – thuhet në reagimin e Ambasadës Amerikane.
Lexoni Deklaratën e Sekretarit të Shtypit të Shtëpisë së Bardhë mbi Dëbimin e Zyrtarëve të Shërbimit të Inteligjencës Ruse:
“Sot, Presidenti Donald J. Trump urdhëroi dëbimin e dhjetra oficerëve të inteligjencës ruse nga Shtetet e Bashkuara dhe mbylljen e konsullatës ruse në Seattle për shkak të afërsisë me një nga bazat tona nëndetëse dhe Boeing.
Shtetet e Bashkuara e marrin këtë veprim në bashkëpunim me aleatët dhe partnerët tanë të NATO-s anembanë botës, në përgjigje të përdorimit të armës kimike ushtarake nga Rusia në tokën e Mbretërisë së Bashkuar, akti i fundit në vazhdën e saj të vazhdueshëm të aktiviteteve destabilizuese në mbarë botën.
Veprimet e sotme i bëjnë më të sigurta Shtetet e Bashkuara duke ulur aftësinë e Rusisë për të spiunuar amerikanët dhe për të kryer operacione të fshehta që kërcënojnë sigurinë kombëtare të Amerikës. Me këto hapa, Shtetet e Bashkuara dhe aleatët tanë i bëjnë të qartë Rusisë se veprimet e saj kanë pasoja.
Shtetet e Bashkuara janë të gatshme të bashkëpunojnë për të ndërtuar një marrëdhënie më të mirë me Rusinë, por kjo mund të ndodhë vetëm me ndryshimin e sjelljes së qeverisë ruse.”
(E.L/Faxweb)
Discussion about this post