Në një analizë për një të përditshme në vend, analisti dhe politikani Preç Zogaj shkruan se pretendimi se kryeministri Edi Rama ka bërë në tre vite qeverisje më shumë se sa është bërë në 25 vite, është diçka e turpshme.
“Të kërkosh ndjesë që ke bërë me shumë për tre vjet sesa kanë bërë të tjerët në njëzet vjet është komike, e pasinqertë. Unë nuk them se të gjitha përgjegjësitë dhe fajet për gjendjen i takojnë kësaj qeverie, po të mos ndiejë asnjë, kjo është qesharake. Pse i thotë vetes qeveri atëherë? Kjo e rrëzon në themel, si një hipokrizi, listën e ndjesave. Sepse kur flitet për çështje të pushtetit dhe qeverisjes në veprim, ndjesa është në vetë të parë, është për atë që ti mendon se ke bërë keq, ke bërë gabim apo nuk e ke bërë fare siç e ke premtuar. S’ka ndjesë jashtë vetes tënde”, shprehet Zogaj..
Më pas analisti flet edhe për lidhjet e qeverisë me botën e krimit dhe denoncimet që ka bërë opozita.
“Opozita ka denoncuar me emra dhe fakte lidhjet e krimit me qeverinë, ka denoncuar drejtues të policisë të lidhur me narkotrafikantë, sikurse ka denoncuar koncesionet korruptive në shëndetësi. Kjo nuk është baltë mbi uniformat blu apo bluzat e bardha. Kryeministrit në këtë rast thjesht kërkon t’i trajtojë punonjësit e shëndetësisë dhe policisë si mburoja njerëzore për akuzat që i drejtohen atij dhe ministrave të tij”, vijon analizën e tij Preç Zogaj.
Ai shkruan se aktualisht nuk ka asnjë bandit me emër të arrestuar dhe bosë të mëdhenj të drogës, teksa shton bandat që mbajnë nën terror qytete e krahin, ndërsa paralajmëron se këto grupe kriminale po përgatiten t’u lëshohen si lukuni zgjedhjeve të ardhshme.
“Bandat dhe banditët që mbajnë nën terror qytete e krahina, dhe që po përgatiten t’u lëshohen si lukuni zgjedhjeve të ardhshme reklamojnë bekimin e tij prej shefi dhe garanti. Në qytetin, lagjen apo fshatin ku banojnë qytetarët shqiptarë i njohin banditët lokalë dhe e dinë se kush i mbron e pse i mbron. Kjo do të ishte e vetmja ndjesë, e vetmja falje, e vetmja mea culpa reale e Edi Ramës”, shkruan ndër të tjera në analizën e tij Preç Zogaj. (A.R/SHUPLAKA)
