Kampingut të të rinjve socialist në Jalë u është bashkuar edhe deputeti Taulant Balla. Gjatë një bashkëbidesimi me të rinjtë e FRESSH, Balla foli për fushatën e fundit zgjedhore, të cilën e konsideroi si ndër më të vështirat.
“Si kudo dhe në Elbasan ne arritëm që të marrim një mandat më shumë nga zgjedhjet e vitit 2013, duke i garantuar Partisë Socialiste 74 mandate në Kuvendin e Shqipërisë, duke hapur një etapë tjetër të zhvillimit të Shqipërisë. Ne i kërkuam popullit që të na jepte një mandat që të qeverisnim vetëm, por kjo nuk do të thotë që ne do qeverisim vetëm, do jemi përsëri në aleancë, në koalicion, por tashmë në aleancë me njerëzit e zakonshëm të këtij vendi”, – tha Balla.
Sakaq, ai shtoi se pavarësisht se pritshmëritë e shqiptarëve janë më të mëdha se në 2013-ën, PS nuk do ta ketë shumë të vështirë të fitojë zgjedhjet.
“Më e vështirë sesa fitorja vetëm është që ne t’i qëndrojmë pritshmërive që njerëzit kanë ndaj nesh, sepse pritshmëritë e shqiptarëve ndaj PS sot në korrik të 2017 janë shumë më të mëdha se në korrik të 2013 dhe në krye të katër viteve nëse ne do t’i qëndrojmë angazhimeve tona do të jemi përsëri këtu në përfundim të një fushate tjetër zgjedhore të 2021, ku nëse ne do ta ruajmë bashkëpunimin dhe komunikimin me njerëzit e zakonshëm nuk është aspak e vështirë që PS në 2021 t’i fitojë zgjedhjet. Ne nuk i fitojmë zgjedhjet për shkak se kemi kundërshtarë të dobët apo për shkak të sistemit zgjedhor, por i fitojmë zgjedhjet sepse jemi e vetmja forcë politike e besueshme për shkak edhe të faktit që kemi të vetmin lider të besueshëm nga shqiptarët për të drejtuar vendin”, ishin fjalët e Ballën. (D.D/Shuplaka)
Discussion about this post