Një person është vënë në prangat e policisë pas tentativës për të vrarë me armë zjarri një tjetër person. Është vënë në pranga shtetasi Arjan Skënderi 35 vjeç, banues në Kllobçisht-Maqellarë. Ai akuzohet se tentoi të vrasë me armë zjarri automatik shtetasin me iniciale A. B. 43 vjeç.
Ngjarja ka ndodhur rreth orës 10:30 në varrezat e fshatit Kllobçisht. I ndaluari ka qëlluar me armë zjarri mbi xhamin e pasëm të makinës që drejtohej nga shënjestra e sulmit, i cili fatmirësisht nuk është lënduar. Mësohet se motivi i ngjarjes ka qenë se A. Skënderi nuk donte që A. B. të vinte në Klloçisht.
Mbi të ndaluarin rëndon vepra penale “Vrasje me dashje e mbetur në tentativë”.
Detaje të Policisë së Dibrës
Më datën 04.01.2017, rreth orës 10:30, në vendin e quajtur varrezat e fshatit Kllobçisht, konkretisht në rrugën automobilistike të këtij fshati, shtetasi Arjan Skënderi sapo ka konstatuar shtetasin A. B, i cili ka qenë duke drejtuar mjetin Opel Corsa, është afruar tek makina e tij dhe ka qëlluar një herë me armë zjarri mbi xhamin e pasëm, xham i cili është thyer plotësisht. Shtetasi A. B. nuk është lënduar nga e shtëna me armë zjarri.
Në përfundim të veprimeve të para hetimore rezultoi se motivi i ngjarjes ka qenë se shtetasi i arrestuar nuk ka dashur që shtetasi A.B, të vinte në këtë fshat , pasi në vitin 2007, vellai i shtetasit A. B, i quajtur A. B, ka vrarë me armë zjarri shtetasin J. M. (dhëndri i Arjan Skënderit).
Grupi hetimor ka kryer veprimet në vendin e ngjarjes por nuk u arrit të gjendet gezhoja për shkak edhe të motit të keq me dëborë , por dyshohet se pistoleta mund të ketë qenë me mulli. Vijonë veprimet për gjetjen e gëzhojës dhe të armës së zjarrit, si dhe për zbardhjen e plotë të ngjarjes. Materialet i kaluan Prokurorisë së Rrethit Gjyqësor Dibër për veprime të mëtejshme.
(XH.A/SHUPLAKA)
