Aeroporti Nënë Tereza në Rinas është i vetmi aeroport funksional në vend, por megjithatë ai nuk është i sigurtë, pavarësisht se kjo duhet të ishte karakteristika e tij kryesore. Të paktën sipas emisionit investigativ “BOOM” në Ora News, i cili ka kryer një vëzhgim pas ankesave të qytetarëve.
Në parkingun e projektuar për 490 vende automjetesh, 240 të mbuluara dhe 240 të pambuluara, mungojnë kamerat e sigurisë.
DENONCIMI
Parkingu është i ndarë në dy pjesë, P1 dhe P2. TIA nga ana tjetër këtë parking e ka dhënë në formë koncesionare ose nënkontraktore tek një firmë private. Përsa i përket perimetrit është menduar duke e rrethuar atë. Por për parkingun është harruar një element fare i vogël, ai i kamerave të sigurisë.
Në P1 këto kamera nuk ekzistojnë fare, ndërsa në pjesën e parkingut të zbuluar këto kamera janë fizikisht por nuk janë funksionale.
Gazetari: Më kanë gërvishur makinën aty duke dalë ndoshta, ka ndonjë kamer ta shohim?
Punonjësi i parkingut: Ku, në çfarë vendi e ke lënë makinën?
Gazetari: Aty matanë.
Punonjësi i parkingut: Tek ajo taksia atje?
Gazetari: Po, pas taksisë.
Punonjësi i parkingut: Për Zotin vështirë me kap kamera atje, se vetëm në hyrje dhe dalje ka kamera.
Gazetari: Aty nuk ka dmth, thashë ta shoh se pastaj e gjej unë.
Punonjësi i parkingut: E di, ta kishim parë isha marrë dhe unë me të, nuk kishim pas nevojë me të thënë ty. E kishim mbajt burrin e huaj peng aty. E di sa veta ankohen përditë për këtë.
Punonjësi 2 i parkingut: Ne vetëm 3 kamera kemi se këto të tjerat janë jashtë funksionit. Edhe atje janë prishur dhe akoma nuk kanë ardhur me i rregullu.
Gazetari: Nuk punojnë kamerat?
Punonjësi 2 i parkingut: Nuk punojnë kamerat, vetëm 3 copë punojnë. Ajo aty,ajo aty dhe ajo atje(tregon kamerat hyrëse dhe dalëse të parkingut)
BOOM telefonon përgjegjësin e parkingut: Ankohu tek TIA
Gazetarja: Pse nuk ka kamera?
Përgjegjësi i parkingut: Ça kërkon tani, të kanë marrë ty se nuk ka kamera?
Gazetarja: Ka patur në momentin që ju e keni marrë si nënkontraktor?
Përgjegjësi i parkingut: Si nënkontraktor kanë qenë vetëm ato kamera që kemi ne ekzistuese, nuk ka kamera shtesë që thua ti në parking.
Gazetarja: Ato nuk funksionojnë.
Përgjegjësi i parkingut: Funksionojnë të gjitha ato që janë në hyrje dhe dalje.
Gazetarja: Hyrje dhe dalje?
Përgjegjësi i parkingut: Po.
Gazetarja: Ndërsa kamera që monitorohet parkimi, zona c1, c2, b1, b2, parkimi i hapur andej?
Përgjegjësi i parkingut: Jo nuk ka fare andej.
Gazetarja: Po mirë, nuk keni ankesa ju që ka probleme, gërvishtje?
Përgjegjësi i parkingut: Hiç fare, asnjë lloj ankese.
Gazetarja: Nuk ka asnjë lloj ankese? I sigurt për këtë?
Përgjegjësi i parkingut: Po.
Gazetarja: Ju kush jeni, do ma thoni pak emrin?
Përgjegjësi i parkingut: Po. Përgjegjësi i parkingut jam unë.
Gazetarja: Emrin?
Përgjegjësi i parkingut: Po çkutim ka kjo tani se shumë paske ti? Ik atje tek TIA dhe mund të bësh çdo gjë, mund të bësh çdo lloj kërkese që mund të kesh. Ata na marrin në telefon pastaj.
Gazetarja: Ok, faleminderit!
TIA: Po pretë biletën, përgjegjësinë mbajeni vetë
BOOM i kërkoi disa shpjegime kompanisë koncesionare TIA, e cila ka kthyer këtë përgjigje:
“Kompania nënkontraktore që operon parkimin në aeroportin “Nënë Tereza” është Star Parking Albania Shpk. Po hapësirat e parkimit P1 dhe P2 monitohen nga kamera sigurie 24/7 pa ndërprerje”
Dhe pyetjes se a mban përgjegjësi TIA nëse automjetet e qytetarëve dëmtohen në kohën që janë në parkim, TIA shprehet:
“a) Pika 8 e rregullores së parkingut Star Parking Shpk.
– Star Parking Albania Shpk nuk do të jetë përgjegjës për dëmtime direkte ose indirekte të shkaktuar nga përdoruesit e tjerë të parkingut, ose dëmtime, vjedhje, ose tentativë për vjedhje të mjeteve, sendeve të tjera (radio, rrota) ose bagazhe dhe artikuj të tjerë të ndodhura brenda ose jashtë mjetit në fjalë.
b) Pika 13 e rregullores gjithashtu konstaton:
– Duke hyrë në parking me makinën e tij/saj dhe me marrjen e biletës në hyrje përdoruesi i automjetit pranon automatikisht rregulloren e mësipërme”.
Discussion about this post