Parlamenti Evropian do të votojë më 14 shkurt rezolutën për Shqipërinë. Anëtarët e PE do të bazohen mbi raportin e përgatitur nga Knut Fleckenstein dhe të miratuar në Komisionin e Jashtëm.
Drejtuesi i Komisionit të Jashtëm, Elmar Brok, shprehet se si kusht për integrimin e Shqipërisë në BE shikon në veçanti zgjedhjet e lira dhe të ndershme si edhe zbatimin e Reformës në Drejtësi.
Sipas tij, dialogu mes pozitës dhe opozitës, është zgjidhja e vetme për reformat.
“Bisedime dhe bisedime, sepse dialogu për reformat është në të mirë të qytetarëve. Ne jemi në proces konsultimesh me zyrtarët shqiptarë dhe të vendeve të rajonit për vijimin e procesit të integrimit. Ata kanë një mesazh të qartë që është zotimi ynë për t’i mirëpritur në familje. Më parë duhen zbatuar detyrimet sepse ne do të vlerësojmë individualisht secilin shtet në bazë të meritës. Në këtë pikëpamje, zbatimi i reformës në drejtësi është hap i madh”, tha Brok.
Votimi i këtij raporti dhe rezolutës vjen vetëm 5 muaj përpara se shqiptarët të zgjedhin deputetët e rinj. (D.D/Shuplaka)
