Ka diçka që kërcet në performancën e gjithë deputetëve të Kuvendit të Shqipërisë këtë legjislaturë. Nuk ka të bëjë dhe aq me zgjedhjen e Gramoz Ruçit kryetar, i kontestuar, por i sigurtë që do ishte në atë post për shkak të numrave që vetë socialistët kishin, por me atë që po ndodh me programin.
Votimi i sotëm i vuri vulën. Vetëm 78 deputetë votuan programin , socialistët dhe 3 të PDIU-së, të cilët sinjalet i dhanë që me kohë kur deputetja e re Reme Lala zotohej se do e mbështeste Edi Ramën, shtuar edhe Tom Doshi. I bojkotuar për programin nga deputetët demokratë dhe deputetët e LSI-së, a nuk ngjan sikur edhe parlamenti, organi më i lartë ligjvënës në vend ishte shndërruar në një asamble të dytë socialistësh, si ajo te Xibraku?!
Asnjë transparencë për programin, përveç fjalëve pa asgjë të re të ministrave të zgjedhur nga Rama dhe sigurisht për gazetarët ndoshta ka shërbyer më shumë webi i PS-së për t’u thelluar.
Por programi është vetëm një pikë. Sjellja e maxhorancës kundrejt pakicës duket se është ajo që përfundimisht është përcaktuar këto ditë: Mësymja e Edi Ramës për t’i marrë 2 deputetë Bashës, toni i ashpër në emër të ”disiplinës” dhe mbyllja e mikrofonit nga Ruçi për Berishën duke i ndërprerë fjalën dhe sigurisht pranimi i këtij veprimi pa shumë zhurmë nga demokratët. Një stepje e tyre përballë arrogancës së numrave që socialistët së bashku me ata që kanë bindur, kanë.
Tani që janë konfiguruar në Kuvend edhe dy partitë opozitare, duket se kanë nisur edhe problemet e para: mungesa e kompaktësisë së grupit parlamentar demokrat, zgjeruar edhe me debate e konvergjenca mes Berishës, Dumës, Salianjin dhe Bashës në selinë e tyre, shoqëruar më pas me sjelljen e çuditshme të 4 deputetëve që nuk ishin fare në sallë për të votuar kundër programit, prezencën e 7 të tjerëve që me praninë e tyre kanë heshtur dhe ”Kundra”-t e vetëm 51 deputetëve.
Kuptohet që ende nuk ka informacion se cilët janë këta deputetë, por me gjasa të dy partitë do bëjnë llogaritë e tyre edhe pse demokratët bashkë me LSI-në, nuk mund ta ndalin dot Ramën.
A do arrijnë 2 partitë opozitare të kenë kontroll mbi të gjithë deputetët e grupit të tyre?! Sa të lehtë do ta ketë Basha të frenojë rrjedhjet? Çfarë çështjesh do t’i bashkojnë PD-në me LSI-në në qëndrime?
”Përça dhe sundo” duket të ketë qenë deviza e Edi Ramës gjatë fushatës zgjedhore. ”Ndaji kundërshtarët të mos bëhen bashkë”. Ia arriti. Basha gjatë gjithë kohës targetoi LSI-në, ndërsa Rama avanconte në qëllimet e tij.
Tani mbetet të zgjidhet dilema, Basha dëshiron të jetë opozita, apo ende me mendjen e opozitarizmit të fortë afër zgjedhjeve?! Në do, ai vetë dhe partia e tij duhet t’i kishin nxjerrë me kohë jashtë grupi dy ”tradhëtarët” që votuan Ruçin./ Valmora Gogo-Shuplaka
Discussion about this post