Parlamenti edhe pse kaloi një ditë përgjithësisht të qetë në debatet për buxhetin 2025, nuk munguan herë pas here edhe tensionet në sallë në episode të veçanta nga deputetët e opozitës.
Pas përplasjes së parë të Gazment Bardhit që sulmoi tre ministret e kabinetit “Rama” që po bisedonin, teksa deputeti Asllan Dogjani kërkoi të mbahej një minutë heshtje për 14-vjeçarin e vrarë dje pas sherrit në shkollë, konfrontimet janë rikthyer sërish.
Dogjani ka kërkuar rreth orës 20:00 fjalën, teksa do dilte në foltore deputeti Shpëtim Idrizi. Kryeparlamentarja Elisa Spiropali i kërkoi që të lironte foltoren dhe kolegun e PDIU që të fliste. Dogjani ka përdorur edhe fjalë fyese, teksa Spiropali i tërhoqi veshin. Ndërhyrja e Gardës solli debate të tjera dhe deri në konfrontim të lehtë.
Dogjani i kërkoi Spiropalit që të ndërhynte për një nga Gardistët që e kishte ndaluar. Në këtë moment u ngrit edhe deputeti Gazment Bardhi drejt foltores. Dogjani hodhi akuza, teksa nga salla iu përgjigjen edhe deputetët e mazhorancës, mes tyre edhe Erjon Braçe, që i kërkoi të lironte foltoren dhe të mos kërcënonte e pengonte punimet.
Në një moment, kërcënimeve të Dogjanit, Spiropali iu përgjigj me “nuk ta kemi frikën”.
Sipas rendit të ditës, pas fjalës së Idrizit, Shalsit dhe Tabakut, parashikohet të mbahet edhe votimi për buxhetin në seancë plenare.
