Pas aksidentit tragjik që i mori jetën një kalimtari, është liruar deputeti Aqif Rakipi. Sipas Prokurorisë, deputetit i është ndërprerë rruga menjëherë nga kalimtari Seit Sorra, ndaj Rakipi do të hetohet në gjendje të lirë.
Pavarësisht faktit që deputeti ishte larguar nga vendngjarja, policia thotë se ai ka shkuar të dorëzohet vetë në Komisariat. Në detajet e bëra të njohura për mediat, thuhet se deputeti nuk ka konsumuar alkool sipas testit të kryer nga Policia. Një fakt tronditës është që në vendngjarje ka munguar Prokurori i gatshëm, pasi rezultonte që e kishte telefonin e fikur.
“Ndërkohë është formuar grupi hetimor dhe është kërkuar ndërhyrja e Prokurorit të gatshëm, por nuk u mundësua lidhja nëpërmjet celularit, të cilin e kishte të fikur.
Në keto kushte u kryen veprimet e para hetimore në vendin e ngjarjes dhe gjatë kryerjes së veprimeve, u njoftua Prokurori i Rrethit Gjyqësor Tiranë, i cili pasi u informua për rrethanat dhe veprimet e para, kërkoi që krahas Ekspertit autoteknik të Policisë, të caktoheshin edhe dy ekspertë të tjerë autoteknik të jashtëm, me qellim kryerjen e një ekspertimi autoteknik me grup ekspertesh”, thuhet në njoftimin e Policisë.
Automjeti i perfshirë në ngjarje , ndodhet në ambjentet e Komisariatit të Policisë në gjendjen e dorëzimit menjëherë pas ngjarjes, i sekuestruar në cilësinë e provës materiale. (D.D/Shuplaka)
