Pas akuzave të ndërsjella mes ambasadorit të SHBA-ve në Shqipëri, Donald Lu dhe kryeprokurorit të Përgjithshëm, Adriatik Llalla, ky i fundit i është drejtuar Presidencës për t’u takuar me Kreun e Lartë të Shtetit, i thirrur nga ky i fundit. Takimi mes tij dhe presidentit Nishani nuk ka zgjatur më shumë se 30 minuta.
Ndërkaq, ambasadori Donald Lu mësohet se i është drejtuar Kryeministrisë.
Takimi i kryeprokurorit Llalla me presidentin Bujar Nishani, vjen 8 orë pas letrës që Adriatik Llalla u dërgoi Kreut të Lartë të Shtetit, Bujar Nishani dhe kryetarit të Kuvendit të Shqipërisë, Ilir Meta.
Në letrën e plotë, Prokuroria e Përgjithshme akuzon drejpërsëdrejti ambasadorin e SHBA-ve në Shqipëri për një sërë arsyesh, ndër to presioni i Donald Lu për ndërprerjen e hetimeve ndaj kompanive me aktivitet të paligjshëm dhe revokimin e vizave të Prokurorit dhe të tjerë zyrtarëve.
Reagimi dhe zbardhja e plotë e letrës erdhi rreth një orë pas akuzave publike të ambasadorit amerikan, i cili akuzoi Llallën se po cenon Kushtetutën dhe se ka mbajtur qëndrim të kundërt për reformën në drejtësi. (XH.A/SHUPLAKA)
