Në pikën kufitare të Qafë Botës, kalimi i qytetarëve dhe automjeteve private vijon normalisht edhe sot. Megjithatë, për shkak të një situate të krijuar në doganën greke të Mavromatit, është pezulluar përkohësisht qarkullimi i automjeteve që kërkojnë procedura doganore, përfshirë kamionët dhe mjetet me ngarkesa tregtare.
Ky pezullim vjen pas një operacioni të gjerë të autoriteteve greke, i cili ka çuar në arrestimin e 13 punonjësve të doganës së Mavromatit, përfshirë edhe drejtuesin e saj.
Sipas mediave greke, të arrestuarit dyshohen për përfshirje në një skemë korrupsioni dhe kontrabande, ku akuzohen për marrje ryshfeti dhe abuzim me detyrën.
Hetimet kishin nisur prej disa muajsh dhe janë mbështetur në përgjime telefonike, që zbulojnë komunikime të dyshuara mes punonjësve të doganës dhe personave të interesuar për kalimin e mallrave kontrabandë. Sipas raportimeve, në këmbim të pagesave të paligjshme, automjete të ngarkuara me mallra lejoheshin të kalonin kufirin pa iu nënshtruar kontrolleve të detyrueshme.
Si pasojë, është krijuar një bllokim i përkohshëm në qarkullimin e mallrave mes dy vendeve. Autoritetet greke pritet të marrin masa të reja për të rikthyer funksionimin e rregullt të pikës doganore dhe për të garantuar kontrollin e ligjshëm në kufi.
