Dorëheqja e Presidentit të Federatës Spanjolle të Futbollit, Angel Maria Vijar pas arrestimit për mashtrim me fondet e institucionit, mund t’i japë edhe njëherë mundësi Presidentit të Federatës Shqiptare të futbollit, Armando Duka, për t’u bërë pjesë e Komitetit Ekzekutiv të UEFA-s.
Vijar ishte zëvendëspresident dhe njëkohësisht anëtar i Ekzekutivit të kësaj organizate, dorëheqja e tij bën që në Ekzekutiv të mbetet një vend bosh, duke i dhënë mundësinë kreut të FSHF-së të jetë përsëri në garë për këtë pozicion . Duka nuk arriti të fitonte të drejtën e pranisë në këtë Komitet gjatë votimeve që u mbajtën në Kongresin i cili u zhvillua në Helsinki, duke dalë i 9-ti në garën për 8 vende.
Sipas rregullores së UEFA-s, në rast të një vendi të lënë bosh, Kongresi i radhës duhet të zgjedhë anëtarin e ri, me votim, ose me miratimin e propozimit nga drejtuesit e UEFA-s. Në këtë aspect Duka mund të ketë një mundësi pasi ishte kandidati që mori më shumë vota mes atyre që nuk fituan. Gjithsesi kjo mbetet për tu parë në Kongresin e ardhshëm që do të zhvillohet në Bratislavë më 26 shkurt 2018. (B.H/Shuplaka)
Discussion about this post