Bashkimi Evropian ka rënë dakord për vendosje të një raundi të ri sanksionesh kundër Rusisë. Ky vendim vjen një ditë pas bisedimeve SHBA-Rusi në Riad për paqe në Ukrainë dhe vetëm disa ditë para tre vjetorit nga fillimi i luftës Rusi-Ukrainë.
Mediat e huaja raportojnë se sanksionet do të miratohen zyrtarisht nga ministrat e BE-së të hënën, në përvjetorin e tretë të pushtimit të plotë të Ukrainës nga Moska.
Kjo është paketa e 16- të e kufizimeve të BE kundër Rusisë që nga shkurti i vitit 2022.
Në paketën e re të sanksioneve përfshihet ndalimi i importeve të aluminit, një ide që është diskutuar në të kaluarën, por nuk u miratua kurrë për shkak të hezitimit të disa vendeve anëtare që shqetësoheshin për pasojat në ekonominë e tyre.
Përveç metalit të papërpunuar, pjesë e kësaj liste është edhe kundër cisternave që i përkasin “flotës” së Rusisë.
Përfaqësuesja e Lartë e BE-së, Kaja Kallas, shkroi në X duke thënë se me këto sanksione i mbyllin dyert e pasme Rusisë për importe dhe eksporte dhe shtoi se Kremlini s’e thyen vendosmërinë e Unionit.
Kujtojmë se sekretari i Shtetit në SHBA, Marco Rubio, është shprehur se Evropa do të thirret në tryezën e bisedimeve për të diskutuar lehtësimin e sanksioneve për Kremlinin.
“Ka palë të tjera që kanë sanksione, Bashkimi Evropian do të duhet të jetë në tryezë në një moment,” tha Rubio të martën pas takimit me homologun e tij rus në Riad të Arabisë Saudite.
Discussion about this post