Pas denoncimit të abonentit, nis procedimi penal ndaj drejtorit të Ujësjellës Kanalizimeve dhe punonjëses (DETAJE)

Ka nisur procedimi penal ndaj drejtorit të Ujësjellës Kanalizimeve Maliq, V. S. 35 vjeç, banues në Pustec dhe punonjëses S. L. 26 vjeçe, banuese në Maliq, pas një denoncimi të bërë në emisionin investigativ “Fiks Fare”.

Këta shtetas akuzohen se kanë shpërdoruar detyrën duke përvetësuar një shumë lekësh nga arkëtimet e kryera nga banorët  e zonës Maliq. Nga verifikimet e kryera, në librezat e abonentëve kjo shumë është arkëtuar por nuk është bërë derdhja e saj pranë degës ekonomike të ndërmarrjes.

Në investigimin e nisur pas ankesave të abonentëve, “Fiks Fare” zbuloi se “punonjësja Sonila Liço, gjatë kohës që ka punuar si faturiste ka përvetësuar rreth 600 mijë lekë, pagesa mujore të rreth 600 abonentëve të Maliqit të bëra gjatë viteve 2014-2016. Edhe pse gjatë një kontrolli të ushtruar nga Drejtoria Qendrore është vërtetuar përvetësimi që ka bërë punonjësja Liço, ajo vazhdonte të ishte ende në marrëdhënie pune.”

Nga ana tjetër, drejtori i Ujësjellësit për fshatrat e Korçës, u shpreh për emisionin se pas denoncimeve ishte këshilluar edhe me juristin, i cili punon në mënyrë të pjesshme pranë kësaj zyre, dhe është i bindur se punonjësja ka shpërdoruar detyrën. 

Detaje të Policisë së Korçës:

Specialistët e Seksionit kundër Korrupsionit në Drejtorinë Vendore të Policisë Korçë,  në bazë të pamjeve filmike të transmetuara në datë 04.04.2017, tek emisioni investigativ “FIKS FARE” filluan procedimin penal në gjendje të lirë ndaj shtetasve :

• S, 35 vjeç, banues në Pustec, me detyrë Drejtor i Ujësjellës Kanalizimeve fshat Korçë-SHA (neni 248) dhe
• L, 26 vjeçe, banuese në Maliq, punonjëse (nenet 135 e 248).

Procedimi ndaj tyre filloi pasi, dyshohet se këta shtetas kanë shpërdoruar detyrën  dhe kanë përvetësuar një shumë lekësh nga arkëtimet e kryera nga banorët  e zonës Maliq. Nga verifikimet e kryera, në librezat e abonentëve kjo shumë është arkëtuar por nuk është bërë derdhja e saj pranë degës ekonomike të ndërmarrjes.

Materialet i kaluan Prokurorisë të Rrethit  Gjyqësor Korçë, për veprat penale: “Shpërdorimi i detyrës”dhe “Vjedhje e kryer duke shpërdoruar detyrën” parashikuar nga nenet 248 e 135 të Kodit Penal.

(XH.A/SHUPLAKA)