Pas skandalit të kompanisë italiane Serenissima, kompania kontraktuese që kishte marrë përsipër të kryente punimet në Bypass-in e Vlorës dhe Fierit dhe por nuk pagoi kompanitë nënkontraktore duke zvarritur punimet, qeveria ka vendosur ta ritenderojë Bypass-in e Vlorës dhe atë të Fierit.
Siç ishte paralajmëruar nga Kryeministri Edi Rama në muajin prill 2017, se punimet për këto dy Bypass-e, do i jepen një kompanie tjetër, me një kontratë tjetër, kjo u konfirmua dhe nga zv/ministri i Infrastrukturës, Artan Shkreli.
Shkreli tha në Komisionin e Ekonomisë se shumë shpejt do të shpallet fituesi i ri i cili do të përfundojë këto segmente.
“Kemi përcaktuar që në prill do të rinisë puna për Bypass-in e Vlorës dhe atë të Fierit.
Nëqoftëse çdo gjë shkon mbarë, nuk e vëmë dorën në zjarr, por dëshira jonë ësyhtë që në korrik të paktën të nisë puna në një krah për Bypass-in e Fierit,” tha Artan Shkreli.
Kompania Serenissima hyri në tregun shqiptar në vitin 2013, dhe arriti të fitonte dy kontrata me vlerë totale 80 miliona euro.
Kontrata e parë për ndërtimin e Bypass-it të Fierit, u fitua nga Serenissima në 2013-ën me afat përfundimtar tetorin e 2017-ës.
Kompania nuk realizoi objektivat, duke bërë të njëjtën gjë dhe për Bypass-in e Vlorës.
Në prill të 2017-ës, ARRSH prishi dy kontratat me Serenissimën, duke i shfuqizuar për shkak të vonesës në punime.
Kompania Serenissima, ndryshoi pronësinë në shtator të 2016-ës. Serenissima’ (me kapital 5 milionë euro) nën pronësi të A4 Holding spa iu shit kompanisë spanjolle Albertis.
Më pas kompania spanjolle Albertis duke mos arritur të bindë qeverinë shqiptare për përfundimin e punimeve iu shit për 60 mijë euro një sipërmarrësi italian, kompanisë L.C.I. S.r..
Ndërkohë që Serenissima është larguar nga Shqipëria duke mos përfunduar punimet, i duhet të paguajë nënkontraktorëve shqiptarëve 17 milionë euro.
(F.G/Faxweb)
Discussion about this post