Pas dorëheqjes së Kryeministrit Italian Matteo Renzi, në mediat vendase kanë nisur hamendësimet se kush janë kandidatët që mund ta zëvendësojnë atë.
Sipas gazetës “La Repubblica”, nëse presidenti Mattarella nuk shpall zgjedhje të parakohshme kandidatët më të mundshëm për të formuar qeverinë e re janë: ministri i Financave Pier Carlo Padoan, ministri i Punëve të Jashtme Paolo Gentiloni dhe Romano Prodi, ish-kryeministri demokrat i Italisë. Megjithatë sipas prestigjiozes italiane, pretendeti kryesor ështëpikërsht ministri i Financave Padoan.
Këtë pasdite, kryeministri aktual Matteo Renzi do të takohet me Presidentin Mattarella për t’i paraqitur zyrtarisht dorëheqjen. Më pas do të jetë pikërisht presidenti, ai që do të vendosë nëse do të ketë zgjedhje të parakohshme apo jo, por sipas raportimeve shanset për të patur zgjedhje të parakohshme janë shumë të pakta.
Rënia e qeverisë ka pezulluar fondet për zonat e prekura nga tërmetet dhe ndihmën financiare nga BE për bankat italiane, prandaj zyrtarët e lartë italianë gjenden nën preson për një zgjidhje sa më të shpejtë.
