Vrasjet që kanë ndodhur ditët e fundit në Shkodër kanë çuar në shkarkimin nga detyra të shefit të Komisariatit të këtij qyteti, Vasil Çela.
Mësohet se vendin e tij do ta zërë Lorenc Meta, i cili do të jetë nga sot shefi i Komisaritit të Shkodrës.
Ky vendim vjen dy ditë pas vrasjes së vëllezërve, Astrit dhe Brahim Bilali, ndërkohë që për shkak të këtyre rrethanave është shkarkuar edhe drejtori i Policisë së Shkodrës, Vehbi Bushati dhe në vendin e tij u emërua Niko Brahimi i cili ka mbajtur postin e ish-drejtori të Hetimit te Krimet e Rënda.
Lajmin e konfirmoi vetë ministri Lleshaj nga Shkodra i cili ndodhet aty pas vrasjes së dyfshishtë ditën e sotme.
Kujtojmë se Lleshaj e ka cilësuar ngjarjen e dy ditëve më parë si përplasje mes bandave për larje hesapesh. Ministri Lleshaj i ka garantuar qytetarët se Policia e Shtetit është e angazhuar maksimalisht për të ruajtur qetësinë e qytetarëve (lexo këtu).
“Kam ardhur sot në Shkodër. Sot tentakulat e krimit të organizuar kanë arritur përsëri të godasin. Me gjitha goditjet që janë bërë ndaj këtij krimi e shohim se mbetet akoma shumë për të bërë. Dua te garantoj të gjitha qytetarët e Shkodrës dhe të gjithë vendit se Policia e Shtetit dhe strukturat e tjera janë të angazhuara maksimalisht. Për këtë arsye kemi vendosur të ngarkojmë në krye të detyrës për policinë e Shkodrës”-deklaroi Lleshaj.
(F.GJ/FAXWEB.AL)
