Autoritetet thonë se në Kosovë janë raportuar gjashtë raste të të rinjve që kanë rënë pre e lojës “Balena Blu”. Një nga rastet është raportuar një adoleshent me gërvishtje, shkruan REL.
“Balena Blu” e cila luhet ‘online’, kryesisht synon të vë në shënjestër të rinjtë duke provuar që t’i shtyjë ata në vetëvrasje.
Loja fillimisht u përhap në Rusi, por kohët e fundit ka nisur të përhapet edhe në Europë.
Autoritetet e rendit, lidhur me lojën e quajtur ‘’Balena Blu’’, u kanë bërë thirrje prindërve që t’i mbrojnë fëmijët e tyre duke ua pamundësuar qasjen në këtë lojë të rrezikshme.
Baki Kelani, zyrtar për informim në Policinë e Kosovës tha për REL se Policia ka lëshuar një informacion për qytetarët, duke iu referuar prindërve, por edhe qytetarëve në përgjithësi që të kenë kujdes të shtuar dhe të mos bien pre e lojës së shfaqur.
“Po flasim në bazë të informacioneve publike, mbi 130 fëmijë kanë bërë vetëvrasje në Rusi, si pasojë e inkuadrimit të fëmijëve në këtë lojë. Me qëllim të parandalimit të kësaj dukurie, kemi dalë më komunikatë për sqarim se çka është kjo lojë dhe kemi informuar prindërit se si t’i mbrojnë fëmijët e tyre”. (M.D/Shuplaka)
Discussion about this post