Një magazinë me plot 1.2 ton drogë është zbuluar së fundmi në fshatin Lapan, të qarkut të Beratit. Sasia e madhe e bimëve narkotike u zbulua pas një hetimi të nisur nga Prokuroria për Krime të Rënda.
Mësohet se magazina ishte ngritur në një kapanon të braktisur dhe shërbente për tharjen dhe paketimin e drogës.
Bëhet me dije se hetimi nga ana e Krimeve të Rënda vazhdon për zbulimin e kultivuesve dhe poseduesve të sasisë së madhe të drogës, ndërkohë që pritet të bëhen me dije të dhëna të tjera. Deri tani, mësohet se shtatë persona janë shpallur në kërkim nga Prokuroria e Krimeve të Rënda.
“Më datë 23.03.2017, Prokuroria për Krimet e Rënda Tiranë në bashkëpunim me Drejtorinë Vendore të Policisë Berat, mbi bazë të një pune hetimore kanë konstatuar në një magazinë në fshatin Lapan, Skrapar një sasi lënde narkotike e dyshuar Cannabis Sattiva si dhe mbetje të kësaj lënde.”, citohet në njoftimin e Policisë së Beratit.
(XH.A/SHUPLAKA)
