Pas Kamzës edhe bashkitë e tjera të vendit të cilat drejtohen nga përfaqësuesit e opozitës kanë dërguar letra në adresë të KQZ-së, dhe për dijeni Ministrisë së Brendshme, Kryeministrit, me të cilat shprehet qëndrimi i tyre se nuk do të lejojnë futjen e materialeve zgjedhore brenda ambienteve në pronësi të pushtetit lokal.
Ndërkohë në këto shkresa kërkohet zbatimi I dekretit të Presidentit për anullimin e zgjedhjeve me 30 Qershor duke paralajmëruar se punonjësit e Bashkisë nuk do të lejojnë futjen e materialeve zgjedhore as në Qendrat e Votimit as në KZAZ-të përkatëse.Bashkitë që e kanë nisur këtë shkresë deri më tani janë ajo e Kamzës, Devollit dhe e Pogradecit.
Kjo lëvizje nga ana e bashkivë që drejtohen nga përfaqësues të opozitës, vjen në një kohë kur ditën e sotme Kolegji Zgjedhor rrëzoi kërkesën e Idajet Beqirit për dorëheqjen e partisë së tij nga gara, që do të thotë se rikonfirmoi mos ndryshimin e dekretit të parë të Presidentit për 30 Qershorin.
(F.GJ/FAXWEB.AL)
