Pas kanabisit Çako publikon planin e ardhshëm: Goditja e grupeve kriminale, sekuestro makinave luksoze

Është mbledhur sërish sot  Task Forca për raportimin në Zyrën Operacionale të Situatës së kanabisit.

Në fjalën e tij Haki Çako u shpreh se kultivimi i kanabisit ka njohur rënie të ndjeshme vitin e fundit, dhe në vitin e ardhshëm synohet që të mos ketë më asnjë bimë të kultivuar.

Po ashtu Çako ka bërë të ditur planin e ardhshëm të masave të ideuar nga Policia e Shtetit i cili synon goditjen e grupeve të strukturuara kriminale në vend.

“Kemi pasur shkëmbim të vazhdueshëm informacionesh me palën italiane. Këtë vit ka një numër më të pakët të bimëve të kultivuara në krahasim me një vit më parë.

Si një element shumë i rëndësishëm kundër luftës ndaj kanabisit është edhe zbulimi i grupeve të strukturuara. Një vëmendje e veçantë i është kushtuar bashkëpunimit rajonal, janë organizuar një sërë operacionesh të përbashkëta, ka një numër shumë më të lartë personash të arrestuar se një vit më parë.

Është hartuar plani i masave për goditjen e grupeve të strukturuara, sekuestrimi i makinave luksoze që nuk justifikohen nga pasuritë e personave që janë me precedentë kriminalë, kontrolli i personave me precedentë kriminalë që shkaktojnë zhurmë në ambjentet publike, në shkolla apo në hapësira të tjera publike, kërkimin dhe kapjen e personave që janë shpallur në kërkim, sekusetrimi i pasurive të personave që janë të proceduar dhe nuk mund të justifikohen nga të ardhurat e tyre të deklaruara.

Policia është e vendosur në garantimin e rendit publik në përputhje me ato që kërkon qeveria shqiptare”, u shpreh Çako.

(E.K/SHUPLAKA)