Qeveria ka vendosur të tërhiqet nga futja e teknologjisë 5G në vend. Ditën e sotme, Këshilli i Ministrave ka miratuar një memorandum bashkëpunimi me Shtetet e Bashkuara të Amerikës për të garantuar sigurinë e rrjetit 4G dhe 5G.
Një lëvizje e tillë vjen pas kritikave të njëpasnjëshme të ambasadës amerikane në vend, e cila u shpreh e shqetësuar mbi sigurinë e përdorimit të pajisjeve në Kinë, pas lajmit për futjen e 5G.
“Vendim për miratimin në parim të memorandumit të mirëkuptimit ndërmjet Këshillit të Ministrave të Republikës së Shqipërisë dhe Qeverisë së Shteteve të Bashkuara të Amerikës për sigurinë 4G dhe 5 G. Në mbështetje të nenit 100 të Kushtetutës dhe të nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Infrastrukturës dhe Energjisë, Këshilli i Ministrave vendosi:
Miratimin, në parim, të memorandumit të mirëkuptimit, ndërmjet Këshillit të Ministrave të Republikës së Shqipërisë dhe qeverisë së Shteteve të Bashkuara të Amerikës, për sigurinë 4G dhe 5G, sipas tekstit që i bashkëlidhet këtij vendimi”, thuhet në VKM.
Futjen e teknologjisë 5G e lajmëroi pak kohë më parë kryeministri Edi Rama në rrjetet sociale. “ME TIMON PA TIMON SHOFERI JON OSHT KAMPION” thotë ajo kënga e vjetër, ndërsa këtu jam unë që i jap makinës pa prek timon me dorë… Sot nisi në Shqipëri revolucioni industrial mbi teknologjinë 5G”, u shpreh Rama.
Por ambasada amerikane reagoi menjëherë duke i kërkuar qeverisë të ketë kujdes se cilës kompani i beson.
(M. I./ Faxweb.al)
Discussion about this post