Pas kthimit nga Shtetet e Bashkuara të Amerikës, deputetja e PD-së Majlinda Bregu i bashkohet protestuesve në “çadrën e lirisë”, të vendosur përpara selisë së Kryeministrisë.
Sipas deputetes, kjo protestë është aseti më i vyer i opozitës dhe e vlerësoi mbi të gjitha për natyrën paqësore.
“Sapo jam kthyer nga SHBA në një aktivitet ku kam marrë pjesë. Protesta e opozitës është aseti më i vyer i opozitës. Protesta e opozitës është paqësore dhe jo si 21 janari. Mbështes maksimalisht kauzën e opozitës për zgjedhje të lira dhe të ndershme. Jam kundër bojkotit të zgjedhjeve.”, tha Bregu.
Deputetja e PD-së u komentua shumë gjatë ditës së shtunë kur nisi protesta, për shkak se ajo nuk ishte e pranishme. Megjithatë, ajo njoftoi se kjo kishte ndodhur për arsye pune.
“Për shkak të një vizite pune me kolegë nga Parlamenti i Kosovës, Serbisë, Ukrainës dhe Gjeorgjisë në SHBA, nuk kam mundur të jem në protestën e sotme të PD. Por jam e kënaqur që kjo ishte protesta më e madhe e këtyre viteve dhe po aq e bindur se nuk ka çështje më të rëndësishme se sa rikthimi i demokracisë në vend, përmes zgjedhjeve të lira e të ndershme, luftës kundër krimit dhe korrupsionit, hapjes rrugë të zbatimit të ligjit dhe rikthimit të besimit tek politika e ndershme dhe jo e pazareve”, tha Bregu atë ditë. (D.D/Shuplaka)
