Pas lajmit të bërë publik një ditë më parë nga “Shuplaka”, zëvendëskryeministrja Ledina Mandija, e cila është edhe drejtuesja e Task-Force, i kërkon urgjentisht llogari kryetarit të Bashkisë së Vlorës, Dritan Leli, për dhënien me ”koncesion” të sheshit në qytetin e Vlorës.
Konkretisht, Mandija kërkon të dijë se cilës parti i është dhënë sheshi publik për t’u përdorur për dy muaj dhe për llojin e aktivitetit për të cilin është dhënë leja.
“Çfarë praktike është ndjekur në dhënien e lejes? Për cilin subjekt politik është dhënë për përdorim sheshi? Të vihem në dijeni për llojin e aktivitetit për të cilin është dhënë leja?” , janë disa prej pyetjeve që Mandija kërkon sqarim urgjent nga kryetari i Bashkisë së Vlorës, Dritan Leli.
Një akt i paprecedentë i kryebashkiakut socialist të Vlorës, Dritan Lelit, i cili ka favorizuar një subjekt politik për 2 muaj rresht, duke i dhënë një shesh publik të qytetarëve, të cilët paguajnë taksa. Nga ana tjetër qytetarët e Vlorës janë privuar për 2 muaj rresht në përdorimin e këtij sheshi, mirëmbajtja e të cilit paguhet nga taksat e tyre.
A duhet të shkarkohet kryebashkiaku Leli pasi u kap me firmë dhe me vulë duke favorizuar një parti të caktuar? Me dhjetra shkarkime janë kryer këto ditë për pjesëmarrje në fushatë, por kjo i tejkalon të gjitha: përdorimi i hapësirës publike, duke shkelur detyrën, për një subjekt të caktuar zgjedhor.
Sipas dokumentit të siguruar nga “Shuplaka”, Bashkia e Vlorës i ka dhënë për 2 muaj rresht një shesh publik një partie politike. Dokumenti në fjalë është përgjigja që i ka kthyer Bashkia e Vlorës Lëvizjes Socialiste për Integrim në kërkesën e saj për të mbajtur takimet e saj elektorale duke i thënë se “sheshi i është dhënë një subjekti tjetër publik”. Kjo përgjigje nxjerr krejtësisht zbuluar Lelin.
“Në përgjigje të kërkesës suaj ju sqarojmë se Bashkia Vlorë me shkresën nr. 3314/1 datë 5.05.2017 i ka dhënë leje një subjekti tjetër për përdorim nga data 01.05.2017 deri më datën 30.06.2017 sheshin para Pallatit të Sportit “Flamurtari” Vlorë për qëllime elektorale.
Ju sugjerojmë të bëni kërkesë për përdorim të ndonjë ambjenti tjetër”, – shkruhet në dokumentin që mban firmën e kryebashkiakut Leli.
Në dokument shihet firma e kryebashkiakut të Vlorës, Dritan Leli e që mban datën 7 qershor, lidhur me ngjarjen në fjalë.
(XH.A/SHUPLAKA)
