Misionet e ”EURALIUS”-it dhe ”OPDAT”-it kanë përgatitur disa propozime për përzgjedhjen e kryeprokurorit të ri. Misionet vlerësojnë se zëvendësuesi i Llallës do të ketë rolin e një zëvendëskryeprokurori përkohësisht, pasi KLP-ja ende nuk është themeluar.
Në një kohë kur Kryeprokurorit të përgjithshëm Adriatik Llalla po i përfundon mandati dhe reforma në drejtësi është në hapat e para, në media po qarkullon një rekomandim nga misionet e ”EURALIUS”-it dhe ”OPDAT”-it për kryeprokurorin e ri. ”OPDAT”-i bën me dije se kryeprokurori do të zgjidhet me shumicë të thjeshtë.
Dokumenti, të cilit nuk i njihet burimi edhe pas publikimit mediatik, duket se do të përplasë edhe një herë mazhorancën me opozitën.
Burime pranë demokratëve për ”Fax News” thonë se zgjedhja e prokurorit me shumicë të thjeshtë tregon haptazi një eklipsim të reformës në drejtësi. Ndërkaq mazhoranca po përgatitet për seancën e radhës kur Llallës do t’i përfundojë mandati.
Këshilli i Lartë i Prokurorisë ende nuk është themeluar prandaj kryeprokurori i ri do të zgjidhet duke u bazuar në dispozitat ligjore kalimtare, që përcaktojnë të drejtën dhe detyrimin e Kuvendit të zgjedhë një prokuror të lartë, si prokuror i përkohshëm me shumicë të thjeshtë, në prani të më shumë se gjysmës së të gjithë anëtarëve të Kuvendit.
”Euralius”-si dhe ”Opdat”-i thonë se asnjë autoritet kushtetues ose ligjor për Parlamentin nuk mund të zgjasë mandatin e Prokurorit të Përgjithshëm aktual, mbas skadimit të mandatit të tij, pra mandati i Adriatik Llallës përfundon më 3 dhjetor 2017.
Ligji urdhëron emërimin e një Prokurori të Përgjithshëm të përkohshëm, i cili duhet të jetë një nga prokurorët më me përvojë, duke iu referuar kështu vjetërsisë profesionale.
”Euralius”i dhe ”Opdat”-i sugjerojnë që personi i përkohshëm që do të jetë në vendin e kryeprokurorit të republikës të quhet zëvendësprokuror i Përgjithshëm, pasi funksioni i tij është kalimtar dhe nuk është i rregulluar në Kushtetutë.
(V.G/Faxweb)
