Kryeprokurorja Arta Marku e ka nisur me disa takime ditën e sotme. Pas pritjes që i ka bërë në një takim të shkurtër ambasadorit amerikan Donald Lu, ajo ka mbledhur më pas dhe prokurorët e rretheve. Burime për ‘’Fax News” thonë se pjesa dërrmuese e prorkurorëve që janë thirrur në takim kanë qenë të komanduarit në rrethe.
‘’Vazhdoni me hetimet që keni nisur, shkelësit e ligjit do të ndëshkohen”, mësohet të ketë thënë mes të tjerash Marku.
Po ashtu gjatë takimit me LU ajo ka marrë mbështetjen e ambasadës amerikane në lidhje me goditjen e grupeve të strukturuara kriminale. Edhe pse Marku është zgjedhur në mënyrë të njëanshme duket se puna në Prokurori do të vazhdojë.
Burime për “Fax News” deklarojnë se së shpejti do të ketë ndryshime në Prokuroritë e Rretheve pasi priten komandime të reja. Mësohet se drejtuesit e rinj do të jenë në këto poste të komanduar deri në krijimin e KLP-së.
Kujtojmë që mes drejtuesve të komanduar në rrethe janë edhe Dritan Gina i Prokurorisë së Elbasanit dhe Petrit Fusha i prokurorisë së Tiranës. Po kështu i komanduar është edhe Anton Martini i Prokurorisë së Shkodrës por për këtë të fundit mësohet se nuk do të zëvëndësohet. Duhet të theksojmë se duke u bazuar te ligji në fuqi nuk mund të bëhen emërime të reja para se të krijohet KLP-ja.
(E.K/FAXWEB)
