Zëdhënësi i LDK-së, Besian Mustafa, ka folur pas takimit tre orësh mes krerëve të LDK-së dhe Lëvizjes Vetëvendosje. Mustafa ka thënë se ka lëvizje të pozicioneve të dy partive, dhe ka paralajmëruar edhe një takim për nesër.
“Ka përfunduar. Kemi lëvizje në përpjekje për marrëveshje. Do të kemi edhe një takim të radhës nesër”, ka thënë Mustafa.
Kujtojmë se ditën e djeshme ishte takimi i fundit mes tyre, ndërsa në ambientet e Kuvendit të Kosovës ata janë takuar sërish sot. Prej 6 tetorit kur edhe janë zhvilluar zgjedhjet, dy partitë me numrin më të madh të mandateve ende nuk kanë gjetur marrëveshje për ndarjen e pushtetit, ndërsa Kurti deklaroi para takimit me Mustafën se ndodhen shumë pranë finalizimit të saj.
Deklarata e sotme e përfaqësuesit të LDK-së, duke marrë parasyesh edhe atë që deklaroi Kurti mëherët, lë për të kuptuar se ekziston mundësia që ditën e nesërme të ketë një lajm pëfundimtar në lidhje me këtë çështje.
(F.GJ/FAXWEB.AL)
