Lista e Lezhës për deputetë nga Partia Socialiste duket se po shteron. Ditën e sotme edhe pse KQZ-ja nuk i hoqi mandatin pas kërkesës së Prokurorisë deputeti Armando Prenga dha dorëheqjen. Në letrën e drejtuar kryetarit të Kuvendit Meta ai tha se jep dorëheqjen edhe pse nuk preket nga ligji i dekriminalizimit.
Po ai që vjen pas tij në listë është më keq! Kastriot Piroli nuk mund të zëvendësojë Armando Prengën.
Piroli, i cili pason listën e kandidatëve socialistë në zgjedhjet e 2013-ës, rezulton të ketë edhe ai probleme me drejtësinë.
Ndaj tij ka dy vendime të formës së prerë në vitin 2016, për veprën penale “shpërdorim detyre”, gjatë kohës që ushtronte detyrën e Drejtorit të Hipotekës së Kurbinit.
Kastriot Piroli është dënuar me një vit e 6 muaj burg, që i është konvertuar me 18 muaj shërbim prove. Ndërsa herën e dytë është dënuar me 6 muaj burg, të cilin e ka shlyer me periudhën e paraburgimit.
Në të dyja rastet Apeli e ka shpallur fajtor, e për pasojë Kastriot Pireli është subjekt i ligjit të Dekriminalzimit dhe nuk mund të zërë karrigen e lënë bosh nga Prenga..
E fundit në listën e kandidatëve të PS Lezhë është Mirela Neli, e cila bashkë me Mejreme Delishin kanë dhënë tashmë dorëheqje që prej shtatorit 2013 kur i hapën rrugë mandatit të ish-deputetit tjetër të dorëhequr, Arben Noka.
Në këto rrethana, bazuar në Kodin Zgjedhor, nëse shteron lista e kandidatëve të PS Lezhë atëherë mandati i kalon partisë aleate në koalicion (më 2013) me herësin më të lartë. Referuar të dhënave të KQZ partia tjetër me herësin më të lartë është LSI me 2940 vota dhe mandati mund ti kaloje kandidatit tjetër në listë ish-deputetit të Partisë Agrare rreth një dekadë më parë, Petrit Gjoni. (E.K/SHUPLAKA)
