Presidenti i Republikës Franceze ka dekoruar akademikun dhe shkrimtarin shqiptar Luan Starova me urdhërin e lartë Oficer i Legjionit të Nderit (Officier de la Légion d’honneur).
Shkrimtari dhe akademiku Luan Starova, që nga viti 2000, ka edhe një dekorate tjetër franceze, e njohur me emrin Komandor i Arteve dhe Letërsisë (Commandeur des Arts et des Lettres).
Luan Starova është anëtar i Akademisë Europiane të Shkencave, i Akademisë së Shkencave dhe Arteve të Maqedonisë (edhe nënkryetar i saj), si dhe anëtar nderi i Akademisë së Shkencave të Shqipërisë.
Kryeministri i Shqipërisë, Edi Rama u nderua po ashtu nga Presidenti francez Francois Hollande me dekoratën e lartë të Komandantit të Urdhrit të Legjionit të Nderit
Ky dekorim surprizë u krye jashtë kushteve normale të reciprocitetit, gjë shumë e rrallë në protokollin e Presidencës franceze që në rastin e figurave shtetërore akordohet vetëm si njohje meritash të veçanta.
Dekorata e lartë iu dorëzua Kryeministrit Rama gjatë një ceremonie nga homologu i tij francez, Bernard Cazeneuve
Kryeministri francez Bernard Cazeneuve në fjalën e tij me rastin e ceremonisë së dhënies së medaljes së Komandantit të Legjionit të Nderit kryeministrit Edi Rama, theksoi rolin që Rama ka luajtur në forcimin e mëtejshëm të lidhjeve midis Francës dhe Shqipërisë.
“Çdokujt këtu i kujtohet prania juaj, gjatë manifestimit të 11 janarit 2015, në krah të popullit francez, duke valëvitur, në homazh të karikaturistëve të vrarë disa ditë më parë të ‘Charlie Hebdo’, lapsat tuaj me ngjyrën blu, të bardhë e të kuqe. Përmes këtij simboli, ju shprehnit, si prirjen tuaj të dyfishtë prej artisti dhe politikani të angazhuar, ashtu edhe marrëdhënien vetjake që ju lidh me vendin, me gjuhën dhe me kulturën tone”, tha ai. (M.D/ Shuplaka)
Discussion about this post