Pas shumë vitesh mungesë, Erjona Shehu rikthehet në televizion

Moderatorja e njohur Erjona Shehu, e cila prej vitesh ishte shkëputur nga bota e televizionit për t’ju përkushtuar totalisht profesionit të saj si mjeke, ka vendosur të rikthehet sërish në televizion. Nga Top Channel që ka qenë më përpara, Erjona ka kaluar tek Televizioni Publik Shqiptar.

Në një intervistë për Dritare.net, Erjona Shehu tregon se i është përgjigjur pozitivisht ftesës së TVSH-së për të drejtuar çdo të mërkurë emisionin “Pasditja ime”. Megjithatë, pavarësisht se po merr një angazhim në television, kjo nuk do të thotë se Shehu do lërë pas dore punën e saj si mjeke.

“Zgjodha TVSH-në sepse u ofrua në formatin që unë kisha zgjedhur për t’u rikthyer në televizion. Pavarësisht shkëputjes, impenjimit që kam me kohë të plotë si mjeke, nga mëngjesi në darkë, e kisha menduar gjithmonë të kthehesha në një format televiziv.

Por ishte gjithashtu sepse Rezart Aga dhe emisioni në TVSH e materializoi atë që unë kisha në kokë. Ky rikthim me informacion shëndetësor, do të jetë mjaftueshëm, që të mos më pengojë me aktivitetet e përditshme, si mjeke.”, tregon Shehu, duke zbuluar kështu edhe arsyet se pse ka zgjedhur TVSH-në.

Më tej, shehu tregon se bëhet fjalë për një program që lidhet me kujdesin për shëndetin, që sigurisht si mjeke është edhe pasioni i saj më i madh.

“E mërkura do të jetë format shëndetësor, do i dedikohet shëndetit me të gjitha informacionet që do të ofrojmë. Nuk është risi sepse në televizionet shqiptare ka emisione shëndetësore. Duke filluar që nga Flamur Topi, me emisionin e tij për t’u vlerësuar, që ka hyrë në histori sepse transmetohet në ekran prej më shumë se 55 vjetësh. Por ajo që do të jetë pak më ndryshe është dinamika, do të ketë më shumë ritëm, me shumë të ftuar dhe mënyra e pyetjeve do të ndryshe. Pyetjet do të jenë të njëjta me ato që do donte të bënte kushdo që do e ndiqte emisionin nga kahu tjetër i televizionit. Pra pyetje që ne duam t’ia bëjmë mjekut, por nuk dimë si t’ia bëjmë. Në këtë rast unë do vihem në rolin e pacientit dhe do flas si një paciente e vërtetë në studio.”, tregon moderatorja dhe mjekja e njohur. (D.D/Shuplaka)