Zyrtarë në të gjithë Shtetet e Bashkuara janë në gjendje të shtuar gatishmërie për një sulm të mundshëm në territorin amerikan, pas goditjeve ushtarake që SHBA ndërmori kundër Iranit.
Sipas partnerit amerikan të BBC-së, CBS News, disa agjentë të FBI-së që më parë ishin angazhuar në çështje të zbatimit të ligjeve të imigracionit, si pjesë e objektivave të Trump për deportime, janë rikthyer në detyra që lidhen me kundër-terrorizmin. Të dielën, byroja dërgoi një udhëzim në zyrat rajonale duke kërkuar që burimet të përqendrohen te kërcënimet terroriste.
FBI nuk ka konfirmuar në mënyrë zyrtare ndonjë ndryshim të prioriteteve. “FBI nuk komenton mbi rregullime specifike operacionale apo vendime për personelin,” thuhej në një deklaratë të saj.
“Sidoqoftë, ne vlerësojmë dhe rishikojmë vazhdimisht burimet tona për t’iu përgjigjur kërcënimeve më urgjente ndaj sigurisë kombëtare dhe për të garantuar sigurinë e popullit amerikan.”
Edhe pse nuk ka një kërcënim të identifikuar konkretisht, ditët e fundit autoritetet amerikane kanë arrestuar 11 shtetas iranianë që ndodheshin ilegalisht në SHBA. Disa prej tyre kanë lidhje me ushtrinë iraniane apo me grupe të armatosura të mbështetura nga Irani.