Një tjetër incident ka ndodhur në Londër mbrëmjen e sotme, pas sulmit me furgon që mori përpara dhjetëra njerëz.
CNN raporton se dy burra kanë hyrë në një restorant në “Borough Market”, në jug të Urës së Londrës, dhe therën me thikë dy persona brenda.
Ndërkohë policia është përgjigjur edhe rreth këtij incidenti, duke thënë se njësitë e policisë janë dërguar në vendngjarje.
Përpara këtij sulmi, BBC shkruante se një furgon ka kaluar në zonën e këmbësorëve në Urën e Londrës, duke goditur të paktën 20 persona.
Policia është vënë në lëvizje duke bllokuar urën në të dyja drejtimet, ndërsa ambulancat janë vënë në ndihmë të qytetarëve. Ende nuk ka një raportim mbi numrin e saktë të të lënduarve.
Anglia është në gjendje alarmi që pas sulmit në një koncert të Ariana Grandes në Mançester, ku 22 persona humbën jetën, pjesa më e madhe të mitur, dhe 59 të tjerë mbetën të plagosur. (D.D/Shuplaka)
