Trajneri i Kukësit, Ernest Gjoka, ka filluar të mendojë për paraqitjen e verës në kupat e Europës dhe i ka vendosur vetes një qëllim, grupet e Ligës së Europës. Në një intervistë të dhënë për emisionin “Zona Gol” në “Supersport”, ai tha se për të bërë realitet diçka të tillë, hapat duhen hedhur një e nga një.
“Liga e Kampioneve është një ëndërr darke, por grupet e Ligës së Europës janë më të arritshme dhe dua ta realizoj këtë ëndërr. Por për të arritur diçka të tillë duhet t’i marrim gjërat me radhë. Si fillim të mbarojmë kampionatin, më pas do të ulemi me presidentin të flasim për përforcimet që do i bëjmë ekipit. Pasi të bëjmë këto, na mbetet vetëm të punojmë dhe të shpresojmë për të bërë diçka të bukur”, tha Gjoka.
Vlen për t’u kujtuar që Kukësi do ta fillojë aventurën europiane në turin e dytë kualifikues të Ligës së Kampioneve dhe në bazë të koefiçentit që ka, do të jetë në vazon jofavorite në short. Kjo do të thotë që kundërshtari do të jetë i një niveli shumë të lartë dhe në rast eliminimi në këtë tur, aventura europiane mbyllet vetëm me këto dy ndeshje. (E.K/SHUPLAKA)
Discussion about this post