Kryeministri Edi Rama dhe kreu i opozitës Lulzim Basha kanë zhvilluar një takim për tre orë me rradhë në Presidencë, me ndërmjetësimin e kreut të Shtetit Bujar Nishani, në përkjekje për t’i dhënë fund krizës politike në vend.
Por nga ky takim tre orarësh nuk ka pasur asnjë marrëveshje mes palëve. Por thuhet se do të vazhdojnë bisedimet mes palëve në ditët në vijim.
Ftesa për dialog u bë nga Presidenti Nishani, ndërsa në tryezën e diskutimeve të pranishëm ishin dhe dy kryetarët e grupeve parlamentare të PS-së dhe PD-së, Gramoz Ruçi dhe Edi Paloka.
Po kështu një njoftim zyrtar vjen nga Zyra e Presidencës, e cila ka reaguar pak minuta pas përfundimit të takimit të kryetarit të Partisë Demokratike, Lulzim Basha me Kreun e Lartë të Shtetit, që pasoi takimin me kryeministrin Rama.
Me ftesë të Presidentit të Republikës, Sh.T.Z. Bujar Nishani sot u zhvillua një takim midis Kryeministrit të vendit z. Edi Rama dhe Liderit të opozitës z. Lulzim Basha.
Gjatë takimit palët prezantuan pikëpamjet e tyre mbi krizën politike dhe rrugët e zgjidhjes së saj.
Presidenti i Republikës vijon të mbajë kontaktet me palët për gjetjen e një zgjidhjeje të mundshme mbi bazë kompromisi. (J.V/Shuplaka)
Discussion about this post