Vdekja e liderit historik të Kubës Fidel Kastro ka nxitur reagimet e liderëve botërorë. Në një mesazh të dërguar për qeverinë kubane lideri rus Vladimir Putin ka shprehur vlerësimet më të mëdha për kontributin e Kastros.
‘’Emri i këtij lideri të shquar është padyshim simboli i një ere të re që ka përfshirë jo vetëm Kubën në drejtimin e tij, por të gjithë botën. Kuba e lirë dhe e pavarur është një shembull pozitiv dhe frymëzues, që u dha për shumë vende e popuj. Ai ishte një njeri i fortë dhe plot besim për të ardhmen’’, është shprehur Putin në mesazhin e dërguar për liderin e tanishëm të Kubës Raul Kastro, vëllain e të ndjerit.
Ai ka vlerësuar rolin e Kastros edhe për ndërtimin e një marrëdhënie të fortë ndërmjet Rusisë dhe Kubës.
‘’Fidel Kastro ishte një mik i vërtetë dhe besnik i Rusisë. Ai vetë personalisht ka investuar një pjesë të kohës së tij për ndërtimin e marrëdhënieve strategjike në shumë sfera të komunikimit midis vendeve tona. Kujtimi i tij do të jetojë gjithnjë në zemrat e rusëve’’, ka mbyllur mesazhin e tij Putin.
