Një punëtor, roje pallati në Golem të Lushnjës, humbi jetën si pasojë e të ftohtit dhe mungesës së kushteve të punës. Derisa ai ishte gjallë, Inspektorati Shtetëror i Punës nuk u kujdes të interesohej për kushtet në të cilat ai dhe shumë punëtorë të tjerë punojnë.
“Punonjësi Çepa, që humbi jetën ndërsa punonte roje pallati dhe strukturat që duhet të këqyrin kushtet e punës. Së pari është Inspektoriati Shtetëror i Punës, i cili varet nga Ministria e Mirëqenies Sociale dhe Rinisë. Inspektoriati nuk ka vepruar në rastin Çepa, po ashtu Ministria e Punës. As ka kontrolluar se në çfarë kushtesh punonte Çepa, as nëse ishte i siguruar, as se për cilën kompani punonte.”, shkruante “Shuplaka” një ditë më parë.
E pikërisht një ditë pas artikullit të “Shuplakës”, dy ditë pas vdekjes së Bashkim Çepës, viktimës të tretë të të ftohtit, Inspektorati me në krye drejtorin Dritan Ylli zgjohet nga gjumi letargjik dhe vihet në punë.
“Ekipet e inspektorëve të dalin në terren për të kontrolluar nga afër kushtet e punës se si punohet në sektorë të ndryshëm në këtë mot ekstrem.” ka urdhëruar Drejtori i Përgjithshëm të Inspektoratit të Punës, Dritan Ylli.
Ky aksion që synon kontrollin e punëtorëve që punojnë në mjedise të hapura nëse janë të pajisur me veshjet e përshtatshme për të punuar në temperatura të ulëta, do të kishte vlerë nëse do të ndërmerrej kur punëtori në Lushnjë ishte ende gjallë. E atëherë mund të flisnim për mbrojtje të jetës dhe shëndetit të punëtorit, por siç funksionon duhet fillimisht një kurban. (XH.A/SHUPLAKA)
Discussion about this post