Pasagjerët qëndrojnë në radë, vonesa me tragetet në Durrës dhe Vlorë. Pezullohet lundrimi për mjetet e vogla dhe anijet e peshkimit

Është pezulluar sërish lundrimi detar për mjetet e vogla në Vlorë, si pasojë e erës së fortë dhe detit të trazuar.

Burime bëjnë me dije për Faxweb.al se kapiteneria e portit të Vlorës ka njoftuar se është ndaluar nisja e të gjitha mjeteve të vogla lundruese dhe anijeve të peshkimit, ndërkohë që vonesa ka pasur dhe në zbritjen e pasagjerëve nga trageti Brindisi-Vlorë, të cilët prej një ore qëndojnë në radë.

Vonesa me tragetet ka pasur sakaq edhe në Durrës. Burimet bëjnë me dije se “Golden Bridge” i parashikuar për t’u nisur mbrëmjen e djeshme rreth orës 23:00, ka lënë portin e Durrësit rreth orës 02:00 të kësaj të enjteje.

“Rigel III” i parashikuar po ashtu për t’u nisur në orën 23:00 nuk është nisur fare, pasi ka pasur vonesa dhe në përpunimin e të dhënave.

Burime nga kapiteneria bëjnë me dije se moti i keq në shtetin fqinj ka shkaktuar vonesa për lundrimin e trageteve të linjës Bari-Durrës.

“Rigel VII” dhe “Af Francesca” duhej të kishin mbërritur në portin e Durrësit në orën 08:00 të kësaj të enjteje, por kapiteneria bën me dije se do mund të ankorohen në port në mesditë, rreth orës 13:00.

Njoftimi i plotë i kapitenerisë së Vlorës:

Në  bazë  të  parashikimit  për  situatën  hidrometeorologjike  të  përkeqësuar  në  gjirin  e  Vlorës  dhe  jashtë saj  për  ditët  në  vazhdim  në  datën  09.12.2021  në  drejtimin  Jug-JugPerëndim  në  forcën  5-6bft  brenda gjirit  të  Vlorës  dhe  jashtë  gjirit  të  Vlorës  në  forcën  6-7bft  15-20m/s  dhe  lartësi  dallge  nga  1.50  deri 2.50  metra.

ËSHTË NDALUAR DHËNIA  E  LEJE-NISJES  E  TË  GJITHA  MJETEVE  TË  VOGLA LUNDRUESE ,  ANIJEVE TË  PESHKIMIT  QË  OPEROJNË  JASHTË  GJIRIT TË  VLORËS DHE MARJEN E MASAVE PËR SIGURIMIN  E  TYRE.

PËR SHKAK TE KUSHTEVE HIDROMETEOROLOGJIKE TE PERKEQESUARA, TRAGETI I LINJES VLORE-BRINDISI-VLORE KA MBERRITUR NE PORTIN E VLORES POR NUK ESHTE AKOSTUAR, PO QENDRON NE RADE, ME PËRMISIMIN E KUSHTEVE HIDROMETEOROLOGJIKE DO TE AKOSTOHET PER TE SHKARKUAR PASAGJERET DHE AUTOMJETET.

Përmisimi i situatës meteorologjike  të  përkeqësuar  në  gjirin e  Vlorës  dhe  jashtë  saj  për  mjetet  e  vogla lundruese  dhe  të peshkimit  do të  jetë  mbas  datës  09.12.2021  /  14:00.