Ditën e djeshme në ngjarje e rëndë ndodhi në Vlorë, teksa Armando Hallvaxhiu humbi jetën në ujërat e Karaburunit.
34-vjeçari nuk ishte i panjohur në botën e medias dhe në atë të zhytjes, pasi prej disa vitesh ishte angazhuar në disa televizione si operator dhe kishte pasion zhytjen.
Mesazhet e miqve dhe bashkëpunëtorëve të tij gazetarë kanë qenë të shumta në rrjetet sociale, ndërsa të gjithë vlerësojnë profesionalizmin dhe qetësinë e tij.
Prej vitesh Hallvaxhiu ka qenë pjesë e ekipeve të zhytjes në vendin tonë, ndërsa pasioni për ujërat solli dhe fundin e tij të trishtë.
Ai kishte vendosur bashkë me disa shokë të shkonte këtë fundjavë në Vlorë dhe të zhytej në thellësinë e bregdetit të Jonit, por fatkeqësisht nuk ka mundur të dalë prej andej dhe është mbytur në vendin e quajtur shpella e ”Haxhi Ali-ut”.
Mandi, ishte djali i vetëm, ndërsa pak kohë më parë kishte humbur dhe të atin.
Nga kqyrja e trupit të tij nuk u vërejtën shenja dhune, ndërsa shkak mendohet të ketë qenë mungesa e bombolës së oksigjenit. Kanë qenë shokët e tij që e kanë vënë re mungesën dhe më pas të shqetësuar janë zhytur, teksa në thellësi kanë gjetur dhe trupin e tij.
Policia njoftoi se: Më datë 22.04.2018, Salla Operative Vlorë është njoftuar nga një telefonatë se në Karaburun në vendin e quajtur Shpella e ”Haxhi Ali-ut”, është mbytur shtetasi A.H., 34 vjeç, banues në Tiranë, i cili merrej me zhytje. Trupi i pajetë po transportohet në morgun e Spitalit Rajonal Vlorë. Grupi hetimor po punon për sqarimin e plotë të rrethanave të ngjarjes.
Përcjellja për në banesën e fundit do të jetë rreth orës 15:00 të ditës së sotme.
(E.K/FAXWEB.AL)
