Prokuroria e Krimeve të Rënda vazhdon të kërkojë të dhëna shtesë ndaj pesë të dyshuarve të grupit kriminal të kryesuar nga Emiljano Shullazi.
Mësohet se ndaj pesë të akuzuarve ka nisur edhe hetimi pasuror bazuar në ligjin Antimafia, përderisa të akuzuarit do të dalin para drejtësisë edhe për veprën e grupit të strukturuar kriminal, raporton TCH.
Prokurorët u kanë kërkuar informacion bankave dhe institucioneve të ndryshme për t’u bindur dhe për të hetuar nëse 39-vjeçari Emiljano Shullazi zotëron pasuri të luajtshme dhe të paluajtshme.
Nëse konfirmohet që Shullazi ka llogari bankare, apo prona të pajustifikuara, siç shprehen hetuesit, do të kërkohet sekuestrimi i tyre si pasuri të krijuara nëpërmjet veprimtarive kriminale duke marrë parasysh akuzat që rëndojnë mbi të.
E njëjta procedurë është ndjekur nga grupi i hetimit edhe për të dyshuarit e tjerë që i përkasin të njëjtit grup kriminal.
Ai që shikohet si kryesuesi i grupit është Emiljano Shullazi, mbi të cilin rëndojnë nëntë akuza të ndryshme.
Sipas Prokurorisë, Shullazi është njeriu që formoi grupin kriminal, zgjodhi anëtarët dhe ndau rolet në grupin që ka funksionuar edhe me gjobëvënie në dëm të biznesmenëve Ylbi Beqja, Jani Zaka dhe Adriatik Kërçuku.
Shullazi e pret gjykimin në gjendje arresti prej një viti. Data 10 maj është vendosur si dita kur do të çelet procesi për një sërë akuzash ndaj Emilajo Shullazit dhe shokëve të tij. (M.D/Shuplaka)
