Kanë kaluar pothuajse 9 orë nga nisja e procesit të votimit në të gjithë vendin. Edhe pse procesi u duk se nisi qetë, nuk kanë munguar incidentet në disa qendra të votimit. Po situata më problematike paraqitet në disa qarqe kryesore që janë: Elbasani, Lezha dhe Durrësi.
Edhe gara mes forcave në këto zona ka qenë më e fortë, për shkak se të treja partitë kryesore në vend synojnë të marrin maksimumin.
Ngjarja më e rëndë e ditës së sotme është shënuar në Shëngjin të Lezhës ku mbeti i plagosur pas një konflikti me armë simpatizanti i LSI-së Florian Dushku.
Menjëherë pas kësaj ngjarjeje drejt Lezhës u nis kreu i Kuvendit Ilir Meta nga ky bëri një deklaratë të fortë kundër Edi Ramës dhe Haki Çakos. Sipas Metës në rast se ndodh diçka e rëndë në vend të vetmit përgjegjës do të jenë ata të dy.
Në Durrës ka pasur denoncime se në Shijak ka pasur lëvizje të njerëzve të armatosur me kallash në qendrat e votimit. Shqetësimi u ngrit nga përfaqësues të LSI-së dhe pas kësaj drejt Durrësit është nisur dhe ambasadori amerikan Donald Lu.
Jo më pak problem janë hasur dhe në qarkun e Elbasanit ku e pranishme ka qenë ambasadorja Vlahutin dhe pas saj ka shkuar dhe kryeprokurori Adriatki Llalla.
Këto qarqe duhet thënë se janë nga më të rëndësishmit në vend, ku të treja forcat politike synojnë që të marrin maksimumin e rezultateve. (E.K/SHUPLAKA)
