Të premten që kaloi, moderatori Turjan Hyska në emisionin e tij Oktapod, publikoi për herë të dytë një videoklip dedikuar ish-ministrit të Brendshëm, Saimir Tahirit.
Në video jepej një version tjetër i Tahirit, parë në një këndvështrim ndryshe, por sigurisht pa mbetur jashtë kanabisi, policia, krimi…
Tahiri është një ndër ministrat gjatë drejtimit të të cilit lulëzoi droga në të gjithë Shqipërinë.
Kjo anë e tij sigurisht që del në pah dhe në video, por edhe pse për një ministër kjo është diçka aspak jo pozitive që periudhën kur ka drejtuar një post të rëndësishëm të shtetit, ish-ministrit të Brendshëm duket se i ka pëlqyer, madje ai ka reaguar duke thënë se videon e tretë ia ka ai borxh Turit.
“Turjan Hyska, nuk di te te falenderoj per kete apo jo, por kengen e 3te ta kam borxh. E ne vazhdim, sigurisht me te forte”, shkruan ish-ministri.
Nën tingujt e këngës “La Fine” të këngëtarit italian Tiziano Ferro, jepet një version i Saimir Tahirit, ai që punoi fort për Partinë Socialiste, por që në fund u rrëzua dhe nuk u bë pjesë e qeverisë “Rama II”.
Mbase fraza “Nuk më plas” mund të jetë në rregull nëse ai nuk do t’ja dijë pse nuk u zgjodh përsëri në postin e ministrit të Brendshëm, por sigurisht që nuk është aspak në rregull për atë që i bëri Shqipërisë, ku vendi ynë u etiketua si furnizues i gjithë Europës me drogë dhe vend tranzit i drogave të forta.
Kujtojmë se edhe në 2014-ën, Turi publikoi një video për Tahirin, sërish nën tingujt e muzikës italiane, këtë radhë është kënga “Il bombarolo” e Fabrizio de Andre.
Dy videot tregojnë rrugëtimin e Tahirit dhe transformimin e tij nga “ministri më i suksesshëm” tek “ministri më i dështuar” dhe një rikthim i tij.
(D.D/Shuplaka)
Discussion about this post