Në ndryshim nga ish-kryeministri Berisha Astrit Patozi nuk e do një koalicion me Ilir Metën. Në një kohë që prej tre ditësh opozita proteston përpara kruyeministrisë, nga Berisha është hedhur një ftesë në drejtim të Metës. Bashkëpunim për një qeveri teknike.
Ai ka shkuar më tej duke thënë se LSI-në e sheh si bashkëpërgjegjëse në keqqeverisjen e vendit. Ai ka thënë se opozita do t’i qëndrojë deri në fund idesë se nuk do të ketë zgjdhje me Ramën në krye të qeverisë.
“Në këtë protestë janë ftuar jo vetëm LSI, për të cilën kam shumë rezerva, por edhe PS, sepse kjo është ftesë për aleancë për zgjedhje të lira dhe është ftuar çdo përfaqësues politik, që kërkon që Shqipëria të zhvillojë zgjedhje të lira e të ndershme. Ne besojmë se shqiptarët që kërkojnë zgjedhje të lira janë shumë më tepër se sa partitë politike, përfshirë këtu dhe LSI. Unë do isha njeriu i fundit që do përfaqësoja idenë e një koalicioni me LSI. Kjo e fundit është po aq përgjegjëse për katrahurën ku është zhytur vendi. Ne jemi për evolucionin e ideve dhe evolucionin e platformave”, – ka pohuar Patozi në një prononcim për “ABC News”.
Një ditë më parë Berisha i bëri ftesë çdo force politike, duke nënkuptuar edhe LSI-në që të bashkohet me PD për një qeveri demokratike, për të rrëzuar Ramën nga pushteti.
“Zgjedhje të qershorit me Ramën nuk mund të ketë, është moment kritik për kombin. Përveç vitit ’91 nuk ka patur kurrë protestë 4 muaj para zgjedhjeve. Nëse Rama nuk pranon, PD do imponojë që ta pranojë me një këmbë. Do t’i tregojmë vendin atij që nuk është i ndjeshëm ndaj popullit. Qeverinë teknike do e vendosin forcat politike kush do e drejtojë, nuk pengohet njeri të japë kontribut për qeveri teknike,” tha Berisha.
Ftesë LSI-së për t’u larguar nga koalicioni me PS-në i bëri sot edhe deputeti demokrat, Aldo Bumçi, i cili kërkoi nga Ilir Meta “t’i bëjë mirë llogaritë e të bashkohet me opozitën për të rrëzuar Edi Ramën”. (E.K/SHUPLAKA)
