Deputeti i Partisë Demokratike, Astrit Patozi ka thënë nga cadra e opozitës përpara kryeministrisë se të djathtët nuk e kanë harruar tezën e numërimit elektronik por qeveria teknike është zgjidhja e duhur teksa zgjedhjet janë kaq afër.
“Ne kërkojmë qeveri ekspertësh, ajo mund të bëhet që nesër. Bandat dhe shteti mos të jenë bashkë ditën e zgjedhjeve. Kjo mazhorancë ka raporte me krimin. Ata nuk do të kenë kurajo të vjedhin më zgjedhjet nëse miratohet ideja e qeverisë së ekspertëve” u shpreh Patozi.
Ai po ashtu deklaroi se disa ndërkombëtarë nuk e njohin mirë problematikën e Shqipërisë në raport me zgjedhjet dhe mundësinë që ato të sjellin një qeveri që bashkëpunon me bandat për të manipuluar zgjedhjet.
“Duhet të kemi durim me ndërkombëtarët, jo të gjithë e njohin mirë problematikën . Ky është një vend anormal. Ne gjithmonë kemi patur probleme me zgjedhjet dhe standartin e tyre por kjo situatë është e vecantë dhe me anë të kësaj proteste ne duam ta shpëtojmë vendin nga një skenar jo fort pozitiv” tha ai ndër të tjera.
Protesta e opozitës tek “Cadra e lirisë” ka hyrë në ditën e saj të gjashtë dhe ata kërkojnë një qeveri teknike që të mbajë zgjedhjet e 18 qershorit . Të djathtët nuk kanë besim që kjo qeveri mund të garantojë zgjedhje të lira dhe të ndershme.
(M.D/ Shuplaka)
Discussion about this post