Rusia dhe Ukraina kanë njoftuar se kanë kryer një tjetër shkëmbim të robërve të luftës, pavarësisht tensioneve që u krijuan nga rrëzimi i një avioni transporti ushtarak rus gjatë javës së kaluar.
Ministria e Mbrojtjes së Rusisë tha se të dy vendet kishin shkëmbyer 195 robër lufte respektivisht, dhe se robërit rusë do të dërgoheshin në Moskë për të marrë trajtim mjekësor dhe psikologjik.
“Më 31 janar, si rezultat i procesit të negociatave, 195 ushtarë rusë robër që ishin në rrezik për jetën u kthyen nga territori i kontrolluar nga regjimi i Kievit”, thuhet në një deklaratë të ministrisë ruse të mbrojtjes. “Në këmbim, u dorëzuan saktësisht 195 të burgosur ukrainas lufte”.
Pas publikimit të deklaratës, Presidenti ukrainas Volodymyr Zelenskyy shkroi në rrjetin X se ishin liruar 207 ushtarë ukrainas. Ai vuri në dukje se ky ishte shkëmbimi i 50-të që nga fillimi i luftës gati 2 vjet më parë, duke e çuar në 3,035 numrin e të burgosurve ukrainas të riatdhesuar.
